Այս աղցանը պատրաստելու համար ձեզ անհրաժեշտ են․
- Լոլիկ (1խոշոր կամ 2 փոքր չափի)
- վարունգ (1 միջին չափի)
- պղպեղ ( 1 միջին չափի)
- սոխ ( 1 միջին չափի)
- սխտոր (1 պճեղ)
- գազար ( 1 միջին չափի)
- պանիր (150 գրամ, ընտրեք մի քիչ յուղոտ, դեղին պանիր)
- խառը կանաչեղեն ( ես օգտագործել եմ՝ համեմ, սամիթ, անանուխ, ամեն մեկից մի փոքր փունջ, կարող եք ավելացնել նաև մաղադանոս, ռեհան)
- պահածոյացված կանաչ ոլոռ ( 1 փոքր տուփ)
- աղ (ըստ ձեր ճաշակի)
- սև և կարմիր պղպեղ (ըստ ձեր ճաշակի - ես օգտագործել եմ 1/3 թեյի գդալ սև պղպեղ և 1 թեյի գդալ քաղցր կարմիր պղպեղ)
- բուսայուղ ( 2 ճաշի գդալ, եթե սիրում եք, օգտագործեք ձիթայուղ, այն շատ ավելի օգտակար է)
- քացախ (1 ճաշի գդալ)
Այժմ անցնենք պատրաստման եղանակին․
- Կտրատել բանջարեղենը միջին չափի կտորների, որպեսզի հարմար լինեն ուտելուց: Պանիրը կտրատել խորանարդների կամ ձողերի: Գազարը շերտատել բանջարեղենների կեղևը մաքրելու համար նախատեսված դանակով: Այս գործողությունը շատ հեշտ է կատարել: Պատկերացրեք գազարի կեղևահանելու պրոցեսը, ուղղակի մինչև գազարը վերջանա: Այս միջոցով ստացվում են շատ բարակ գազարի թերթիկներ: Թարմ կանաչեղենը նույնպես մանր կտրատել:
- Առանձին կափարիչով փակվող տարայի (կամ փոքրիկ շշի) մեջ լցնել բուսայուղը և քացախը ու մի լավ թափահարել: Այս զանգվածին ավելացնել կտրատած կամ ճզմած սխտորը, սև և կարմիր պղպեղնրը և մի քիչ աղ: Եվ նորից մի լավ թափահարել: Աղցանի սոուսը պատրաստ է:
- Առանձին ամանի մեջ գազարի շերտերը՝ թերթիկները, ցողել այս սոուսով, խառնել ու մի կողմ դնել:
- Այժմ մեծ ափսեի մեջ շերտերով շարել կտրատած վարունգը, լոլիկը, սոխը, պղպեղը, գազարը, պանիրը, պահածոյացված ոլոռը, ինչպես նաև՝ կտրատած կանաչիները: Շերտերի արանքներում երկու-երեք տեղ, նախապես պատրաստված սոուսից մի քիչ ցողել: Շերտերը վեջացնել գազարի թերթիկներով, այն շատ գեղեցիկ տեսք կհաղորդի աղցանին:
Ահա և աղցանը պատրաստ է: Հուսով եմ՝ այն ձեզ դուր եկավ: Բոլորին մաղթում եմ հաճելի օր: Մինչ հանդիպում: :) :) :)
No comments:
Post a Comment