ՍՊԱՆԱԽՈՎ ՁՎԱԾԵՂ

Ողջու՜յն բոլորին: Այսօր որոշեցի մի քիչ խոսել սպանախի օգտակարության մասին: Երբ գարունը բացվում է, շուկաներում ու խանութներում կարող եք բազմատեսակ կանաչեղեն գտնել, այդ թվում՝ սպանախ: Այն շատ հարուստ է վիտամիններով, հանքային նյութերով, ինչպես նաև՝ հակաօկսիդանտներով: Սպանախի տերևները հարուստ են ածխաջրերով, յոդով, պարունակում են երկաթ, ֆոսֆոր, վիտամին C, B խմբի վիտամիններ և այլն: Ընդհանրապես, ես ձգտում եմ մեր սննդակարգում օգտագործել ավելի շատ այն մրգերն  ու բանջարեղենը, որոնք ճիշտ սեզոնին և կլիմայական գոտում են աճեցվել և հասունացել: Սպանախը մեր սննդակարգում օգտագործվում է կամ աղցանների մեջ թարմ վիճակում, կամ էլ ձվով տապակված: Այսօր առաջարկելու եմ սպանախով ձվածեղ պատրաստել ինձ հետ:

Ձեզ անհրաժեշտ են հետևյալ մթերքները․

• սպանախ (2 մեծ կապ)
• ձու (4 հատ)
• բուսայուղ (1 լիքը ճաշի գդալ)
• աղ (ըստ ճաշակի)
• սև և կարմիր պղպեղ (1/3 թեյի գդալ, 1 թեյի գդալ)
• խմելի-սունելի (1/2 թեյի գդալ,կարող եք չավելացնել, եթե չեք սիրում)

Այժմ անցնենք պատրաստման եղանակին:

• Թավան տաքացնել, բուսայուղ ավելացնել և լցնել նախօրոք լվացած և խոշոր մասերի կտրատած սպանախը: Մի քիչ աղ ավելացնել, փակել կափարիչով և շոգեխաշել մոտ 10 րոպե: Նկատի ունեցեք, որ սպանախը եփվելուց ծավալով շատ փոքրանում է:
  
• Երբ արդեն սպանախը կիսով չափ եփված է, համեմել սև և կարմիր պղպեղներով, սունելիով: Մի հատ լավ խառնել և թողնել, որ ավելորդ հյութը գոլորշիանա:

• Այդ ընթացքում ձվերը հարել, մի քիչ աղ ավելացնել և լցնել սպանախի վրա: Փակել կափարիչով, մինչև ձուն ամբողջությամբ պատրաստ լինի: 

• Ահա և սպանախով ձվածեղը պատրաստ է: Այն ձեզանից շատ ժամանակ չի խլի, բայց կզարմացնի իր անուշ բույրով և համով: 

Հուսով եմ՝ հավանեցիք այս բաղադրատոմսն ու առաջիկա օրերս կպատրաստեք այս ձվածեղից:  

ԱՅՍՕՐ ԿԱՐԵՆԻՍ ԾՆՆԴՅԱՆ ՕՐՆ Է

Երկու տարի առաջ՝ այս օրը, աշխարհը փոխվեց ինձ համար: Ծնվեց իմ փոքրիկ ու քաղցրիկ հրեշտակը՝ որդիս, ու լույսով ողողեց իմ կյանքը: Երբ տեսա որդուս առաջին անգամ, մի ակնթարթում փոխվեց իմ ամբողջ աշխարհայացքն ու աշխարհընկալումը: Եվ ես դարձա ավելի խոհեմ, զգույշ և աչալուրջ իմ որոշումներում ու ընտրություններում՝ ցանկացած հարցի վերաբերյալ:
Օրհնյա՜լ լինի ծնունդդ, որդիս, թող Աստված միշտ պահապան լինի քեզ, լուսավորի ճանապարհդ ու ուղղորդի քեզ կյանքի ճիշտ ուղիներով: Լինես միշտ առողջ, երջանիկ և հաջողակ: Ես էլ կփորփեմ միշտ նեցուկ ու թիկունք լինել քեզ կյանքի ցանկացած՝ դյուրին և բարդ պահերին:  Ես պաշտում եմ քեզ, իմ փոքրիկ պահապան հրեշտակ:
*** :) :) :) ***

ՀԱՎՈՎ ԵՎ ԿԱՐՏՈՖԼՈՎ ՏԱՊԱԿԱ

Ողջու՜յն իմ բոլոր ընթերցողներին : Այսօր ձեզ եմ առաջարկում հավով ու կարտոֆիլով տապակայի իմ բաղադրատոմսը: Հավով և կարտոֆիլով տապական մեր տան ամենասիրված ճաշատեսակներց մեկն է: Շատ տարբեր տեղեր կարող եք համտեսել այս տարածված, բայց բոլորի կողմց սիրված ուտեստը, սակայն յուրաքանչյուն իր ձևով է պատրաստում այն, և իհարկե, բոլորին թվում է, թե իր պատրաստածն ամենահամեղն է: :) :) :) Ձեր ուշադրությանն եմ արժանացնում այս բաղադրատոմսը: Եթե որոշեք փորձել այն, կիսվեք ինձ հետ ձեր կարծիքներով :) :) :)

Այս բաղադրատոմսի համար ձեզ անհրաժեշտ են․

• կարտոֆիլ ( 1,5 կգ ), ես կարտոֆիլի կեղևը չեմ մաքրում, դուք կարող եք մաքրել, եթե ուզում եք
• հավի բդկներ (1,2 կգ)
• սխտոր ( 4 պճեղ), եթե սիրում եք սոխ, ապա կարող եք սոխ էլ ավելացնել՝ ըստ ձեր ճաշակի
• աղ (ըստ ճաշակի)
• սև և կարմիր պղպեղ (1/2 թեյի գդալ սև պղպեղ և 2 թեյի գդալ քաղցր կարմիր պղպեղ, 1/2  թեյի գդալ կծու կարմիր պղպեղ)
• բուսայուղ (3 ճաշի գդալ)
• չաման (1 թեյի գդալ)
• խմելի-սունելի (1 թեյի գդալ)
• համեմունքների խառնուրդ, փաթեթի վրա գրված է ախորժակ :) (1 թեյի գդալ)

Այժմ անցնենք պատրաստման եղանակին․

Ահա և ես :) պատրաստվում եմ հավով ու կարտոֆիլով տապական պատրաստել իմ խոհանոցում :)

• Նախ և առաջ անհրաժեշտ է մարինացնել հավի բդիկները: Լավ լվանալ և չորացնել հավի բդիկները: Ավելացնել մեկ ճաշ գդալ բուսայուղ, արդեն ճզմած սխտորը, աղը, պղպեղները և մնացած բոլոր համեմունքները: Մի լավ խառնելուց հետո փակել կափաիչով կամ սննդի համար նախատեսված թափանցիկ թաղանթով ու դնել սառնարանը՝ ամենքիչը 2 ժամ: Հավի բդկները կարող եք մարինացնել նույնիսկ նախորդ գիշերը և պահել սառնարանում: Այն  ձեզ բավականին ժամանակ կխնայի: 

• Կարտոֆիլները մանրակրկիտ լվանալ տաք, հոսող ջրի տակ: Խորհուրդ եմ տալիս կոշտ խոզանակով մաքրել կարտոֆիլները, որպեսզի համոզված լինեք, որ հողի ոչ մի մասնիկ չի մնացել կարտոֆիլ մակերեսի վրա: 
• Եթե միջին չափի կարտոֆիլներ եք վերցրել, ապա ընդամենը բաժանեք երկու մասի: Այնուհետև մակերևույթի վրա փոքրիկ դանակով ոչ շատ խորը բացվածքներ արեք, որպեսզի կարտոֆիլը արագ եփվի ջեռոցի մեջ: 

• Այնուհետև համեմեք կարտոֆիլը աղով, սև և կարմիր պղպեղներով, 2 ճաշի գդալ բուսայուղ ավելացրեք և մի լավ խառնեք:

• Նախապես տաքացրեք ջեռոցը 200°C: Մարինացված հավն ու կարտոֆիլը դասավորեք ջեռոցի թավայի մեջ և եփեք ջեռոցում մոտ մեկ կամ մեկուկես ժամ՝ կախված ձեր ջեռոցից: Չմոռանաք շրջել կարտոֆիլն ու հավը, եթե կա դրա անհրաժեշտությունը՝ կախված ջեռոցից: Եթե ուզում եք համոզվել, արդյոք հավի միսը եփված է, ապա առաջարկում եմ ձեզ վերցնել ամենախոշոր կտորն ու դանակով կտրել ոսկորին մոտ: Եթե արյան հետքեր չկան, միսը ամբողջությամբ սպիտակ է, ապա մյուս բոլոր կտորները նույնպես պատրաստ են:

• Հուսով եմ ձեզ դուր եկավ իմ կողմից առաջարկված այս բաղադրատոմսը: 

Բարի ախորժակ բոլորին: :) :) :) Մաղթում ենք ձեզ հաճելի օր: Մինչ հանդիպում: :) :) :) 

ԴԵՂԻՆ ՈԼՈՌՈՎ ԿՐԵՄ ԱՊՈՒՐ ՉՈՐԱՀԱՑՈՎ (ՍԽՏՈՐԻ ՀԱՄՈՎ)

Ձմռան կամ վաղ գարնան ցուրտ օրերին ես շատ եմ սիրում ապուրներ պատրաստել: Այս ապուրն իր համային հատկանիշներով շատ հետաքրքիր ստացվեց: Այն ինձ շատ դուր եկավ, և ես որոշեցի կիսվել ձեզ հետ այս բաղադրատոմսով: Սխտորահամ չորահացը մի կողմից ընդգծում է ապուրի միատարր  կոնսիստենցան և նուրբ համը, իսկ մյուս կողմից սխտորը շատ լավ հակավիրուսային միջոց է, և դրա պարբերաբար օգտագործումը սննդի մեջ խրախուսվում է նույնիսկ բժիշկների կողմից (իհարկե, եթե չունեք հակացուցումներ ):

Այժմ անցնենք ապուրի պատրաստման եղանակին և մթերքներին:
Այս ապուրը պատրաստելու համար ձեզ անհրաժեշտ է․

• չոր դեղին ոլոռ (2 բաժակ)
• կարտոֆիլ (4  հատ միջին չափի )
• սխտոր (2 պճեղ ապուրի համար և ևս 2 պճեղ չորահացի համար)
• հավի կամ տավարի արգանակ (4 բաժակ), 2 բաժակ ջուր (եթե չեք ուզում արգանակ օգտագործել, կարող եք միայն ջուր օգտագործել)
• համեմ, սամիթ (մի փոքր փունջ)
• չորացրած ռեհան եթե կարող եք թարմ գտնել, օգտագործեք թարմ ռեհան
• սև և կարմիր պղպեղ (1/2 թեյի գդալ սև պղպեղ, 1 թեյի գդալ քաղցր կարմիր պղպեղ )
• սունելի (1/2 թեյի գդալ)
• աղ (ըստ ճաշակի)
• տարեկանի հաց կամ ինչ տեսակի հաց որ ուզում եք
• բուսայուղ (2 ճաշի գտալ)

• Դեղին ոլոռը նախապես եփեք: Այն ձեզանց շատ ժամանակ չի խլի, մոտավորապես կես ժամ կտևի:
• Կաթսայի մեջ բուսակայուղ ավելացրեք և դրեք կրակին: Ավելացրեք նախապես մաքրած և կտրատած կարտոֆիլը և սխտորը ու մի լավ տապակեք, մոտավորապես 4-5 րոպե: Այնուհետև ավելացրեք արդեն եփված դեղին ոլոռը, կտրատած համեմն ու սամթը, չորացրած ռեհանը, համեմեք աղով, սև և կարմիր պղպեղներով, սունելիով և ևս մի քանի րոպե եփեք: 

• Այնուհետև ավելացրեք հավի կամ տավարի արգանակը և ջուրը: Մի լավ խառնելուց հետո եփեք ապուրը մարմանդ կրակի վրա մոտ կես ժամ (միչև որ կարտոֆիլը ամբողջությամբ եփված լինի):  (Կարենս որոշեց անպայման մասնակցել ճաշ պատրաստելու գործընթացին ու մի հատ էլ ինքը խառնեց :) :) :)

•  Երբ ապուրն արդեն պատրաստ լինի, մի կողմ դրեք և թողեք այն հովանա, մինչև բլենդերով (հարիչով) հարելը: 
• Այդ ընթացքում պատրաստեք սխտորահամ չորահացերը: Ձեզ պետք է ընդամենը հաց, սխտոր և մի քիչ բուսայուղ: 

• Կտրատեք հացը բարակ շերտերի ու տապակեք թավայի մեջ մի քիչ բուսայուղով: Երբ արդեն հացի կտորները երկու կողմից լավ տապակվել են, մի կողմ դրեք: 

• Չորահացի կտորները պետք է մի քիչ հովանան, որպեսզի մատները չվառեն սխտորը քսելուց: Երբ դեռ չորահացերը բավակնին տաք են, բայց չեն վառում, վերցրեք սխտորն ու քսեք չորահացի՝ արդեն կոշտացած մակերեսին: Չորահացի կտորներն այժմ կարող եք կտրատել փոքր մասերի: 

• Այս ընթացքում ապուրն արդեն հովացած կլինի, և արդեն կարող եք բլենդերով հարել:

• Լցրեք դեղին ոլոռով կրեմ ապուրը խորը ափսեների մեջ, ավելացրեք սխտորի համով չորահացերը և մնացած կանաչին:

Հուսով եք՝ հավանեցիք այս ապուրի բացադրատոմսը: :) :) :)

ԿԱՐՏՈՖԻԼՈՎ ԵՎ ԳԱԶԱՐՈՎ ՁՎԱԾԵՂ

Ողջու՜յն բոլոր կարդացողներին: Երբևէ պատրաստե՞լ եք կարտոֆլով ու գազարով ձվածեղ: Եթե ոչ, ապա անպայման խորհուրդ կտամ փորձել այս բաղադրատոմսը: Հավատացնում եմ՝ դուք հաճելիորեն կզարմանաք ու կզարմացնեք ձեր ընտանքի անդամներին: Ահա այսօրվա բաղադրտոմսը:

 Ձեզ անհրաժեշտ են հետևյալ մթերքները․

• կարտոֆիլ (4 միջին չափի)
• գազար (2 միջին չափի)
• ձու (3 հատ)
• սոխ կամ սխտոր  (ես օգտագործում եմ միայն սխտոր, 2 պճեղ, որովհետև տան անդամներից մի քանիսը եփած սոխ չեն սիրում, բայց եթե դուք սիրում եք անպայման սոխ էլ ավելացրեք: Այդպես ավելի համեղ կստացվի ձեզ համար) 
• կանաչի՝ համեմ, սամիթ (մի փոքր փունջ)
• բուսայուղ ( ես օգտագործում եմ 3 ճաշի գդալ, բայց ցանկության դեպքում կարող եք ավելի շատ լցնել, եթե մտահոգվում եք, որ կարտոֆիլը թավային կկպչի)
• սև և կարմիր պղպեղ (ըստ ճաշակի, ես օգտագործում եմ 1/3 թեյի գդալ սև պղպեղ և 1 թեյի գդալ քաղցր կարմիր պղպեղ)
• աղ (ըստ ճաշակի)

Այժմ անցնենք պատրաստման եղանակին․

• Նախ և առաջ կտրատեք նախօրոք մաքրած ու լվացած կարտոֆիլն ու գազարը ոչ շատ խոշոր խորանարդների: Թավայի մեջ լցրեք բուսայուղը, կտրատած կարտոֆիլն ու գազարը և տապակեք փակ կափարիչի տակ մոտ 5-7 րոպե:

• Խառնեք կարտոֆիլն ու գազարը: Ավելացրեքլ կտրատած սխտորը (եթե տապակած սոխ եք սիրում, ուրեմն ավելացրեք կտրատած սոխը), համեմեք աղով, սև և կարմիր պղպեղներով: Փակեք կափարիչը և տապակեք ևս 10 րոպե:

• Այս ընթացքում ձվերը ջարդեք ամանի մեջ, մի քիչ աղ ավելացրեք և հարեք պատառաքաղով:

•  Այս ընթացքում կարտոֆիլն ու գազարը պետք է որ եփված և տապակված լինեն: Մի հատ էլ խառնեք կարտոֆիլն ու գազարը և ավելացրեք հարած ձվերը: Փակեք կափարիչն ու տապակեք ևս 3-5 րոպե: 

• Մի քան րոպեից ձվածեղը պատրաստ է: Ավելացրեք կտրատած կանաչին, բաժանեք մասերի և մատուցեք:

Հուսով եմ՝ ձեզ դուր եկավ այս բաղադրատոմսը: Ուրախ կլինեմ լսել ձեր կարծիքները: 

ՀԱԶԱՐՈՎ ՈՒ ԹՈՒՐԻՆՋՈՎ ԱՂՑԱՆ

Ողջույն բոլորին: Այսօր, երբ ես բացեցի սառնարանս ու տեսա, որ արդեն մի քանի օր է, ինչ թուրինջը սառնարանում է մնացել, որոշեցի ինչ-որ հետաքրքիր աղցան պատրաստել դրանով: Աղցանը շատ հաջող ստացվեց․ հատկապես ինձ դուր եկավ թուրինջի թարմացնող թթվաշությունը և հազարի ու բանջարեղենի խրթխրթոցը: Ստորև ներկացնում եմ աղցանի բաղադիրչները և պատրաստման եղանակը: Հուսով եմ՝ դուք էլ մի օր կպատրաստեք այն ու կկիսվեք ինձ հետ ձեր մեկնաբանություններով ու կարծիքներով:

Ահա և անհրաժեշտ մթերքները.

• կաղամբ 150 գր (այս բաղադրատոմսում ես օգտագործում եմ կարմիր կաղամբ, դուք կարող եք օգտագործել սովորական սպիտակ կաղամբ, քանի որ այն էական համային տարբերություն չի տա )
• գազար 2 հատ միջին չափի, մոտավորապես 150 գր 
• գլուխ սոխ (միջին չափի սոխի կեսը լրիվ բավարար է, իսկ եթե չեք սիրում սոխ կամ չեք ուզում օգտագործել ինչ-որ պատճառով, կարող եք այն ընդհանրապես չօգտագործել :) :) :)
• հազար (1 կապ )
• համեմ մի փոքրիկ փունջ
• թուրինջ (ես օգտագործեցի մեկ խոշոր թուրինջի կեսը, եթե այն ամբողջությամբ օգտագործեք, կարծում եմ թուրինջի թթվաշ համը կգերակշռի աղցանի մեջ , ու մյուս մթերքների համը չի զգացվի, այլ կերպ ասած՝  համերի հավասարակշռությունը կխախտվի:
• սև և կարմիր պղպեղ (ըստ ձեր ճաշակի, ես օգտագործեցի 1/3 գդալ սև պղպեղ և 1 գդալ քաղցր կարմիր պղպեղ, ես 2 տարեկան որդի ունեմ, ուստի ուտեստները կծու  պատրաստել չեմ կարող ) :) :) :)  
• աղ՝  ըստ ճաշակի
• բուսայուղ (2 ճաշի գդալ )

Այժմ անցնենք աղցանի պատրաստմանը քայլ առ քայլ․

• Կտրատեք կաղամբը երկար ու շատ բարակ կտորների, գազարը քերեք  մեծ քերիչով, իսկ սոխը կտրատեք կիսալուսնաձև: Կտրատած բանջարեղենը լցրեք մեծ աղցանամանի մեջ:

• Մաքրեք թուրինջը և առանձնացրեք հյութեղ պտղամիսը թաղանթից: Շատ կարևոր է մաքրել թուրինջի սպիտակ թաղանթը, եթե ուղղակի մաքրեք թուրինջը կեղևից ու կտրատեք այն, աղցանը կստացվի շատ դառնահամ: Ահա թե ես ինչպես եմ թաղանթն առանձնացնում պտղամսից:

• Լվացած ու չորացրած հազարի տերևները ձեռքով մասնատեք խոշոր կտորների ու ավելացրեք աղցանամանի մեջ եղած բաջարեղենին: Ձեռքով մասնատելու շնորհիվ հազարի տերևներն ավել երկար թարմ ու խրթխրթան կմնան:
•  Ավելացրեք արդեն մաքրած ու կտրատած թուրինջի պտղամիսը:
• Ավելացրեք բուսայուղը, նախապես կտրատած համեմը, համեմեք աղով, սև ու կարմիր պղպեղներով ու մի լավ խառնեք: Անմիջապես լցրեք մատուցվող ափսեի մեջ և մատուցեք: 

• Հազարի տերևներով աղցան պատրաստելիս միշտ պետք է հիշել, որ այն հեշտությամբ կորցնում է իր թարմությունն ու խրթխրթոցը, ուստի այն պետք է պատրաստել մատուցելուց ամիջապես առաջ:

Հուսով եմ՝ դուք էլ կհավանեք այս աղցանը, իսկ եթե պատրաստեք այն, ապա կիսվեք ինձ հետ ձեր կարծիքով:Անհամբեր կսպասեմ ձեր մեկնաբանություններին: :) :) :)